करवीर निवासिनी अंबाबाईच्या भक्तांसाठी मोठी बातमी! पुढील दोन दिवस देवीच्या मूळ मूर्तीचं दर्शन बंद, मंदिर समितीचा निर्णय

<p><strong>Kolhapur:</strong> करवीर निवासिनी अंबाबाई देवीच्या मूळ मूर्तीवर तातडीने संवर्धन प्रक्रिया करण्यात येणार आहे. भारतीय पुरातत्व विभागाच्या (ASI) सर्वेक्षणानुसार ही प्रक्रिया 11 आणि 12 ऑगस्ट रोजी पार पडणार असून, या दोन दिवसांत भाविकांना मूळ मूर्तीचे दर्शन घेता येणार नाही. त्याऐवजी उत्सव मूर्तीचे दर्शन भाविकांना खुले असेल. पश्चिम महाराष्ट्र देवस्थान समितीचे सचिव शिवराज नाईकवाडे यांनी प्रसिद्धी पत्रकाद्वारे ही माहिती दिली आहे.</p> <p>करवीर निवासिनी श्री अंबाबाईच्या मूर्तीची झीज झाली असून देवीचे नाक, ओठ, हनुवटी याला तडे गेले असल्याने चेहरा व किरीट या भागाचे तातडीने संवर्धन तातडीने गरजेचे आहे असा अहवाल न्यायालयाने नियुक्त केलेल्या तज्ज्ञ समितीने दिला होता&nbsp;</p> <h2>पुरातत्व विभागाची शिफारस</h2> <p>भारतीय पुरातत्व विभागाने अलीकडेच अंबाबाई देवीच्या मूळ मूर्तीचे सर्वेक्षण केले होते. या सर्वेक्षणात मूर्तीचे दीर्घकाळ जतन व्हावे आणि मूर्तीवर होणारा हवामान, प्रदूषण आणि इतर घटकांचा परिणाम कमी व्हावा, यासाठी तातडीने संवर्धन प्रक्रिया करण्याची गरज असल्याचे निदर्शनास आले. त्यानुसार, 11 आणि 12 ऑगस्ट या दोन दिवसांत मूर्तीवर विशेष संवर्धन तज्ञांकडून रासायनिक व संरक्षक प्रक्रिया केली जाणार आहे.</p> <h2>दर्शनाची व्यवस्था</h2> <p>या संवर्धन प्रक्रियेच्या काळात मूळ मूर्तीचा गाभारा भाविकांसाठी बंद राहील. मात्र, भाविकांची श्रद्धा व सोय लक्षात घेऊन या काळात अंबाबाई देवीची उत्सव मूर्ती मंदिरात प्रतिष्ठापित करण्यात येणार आहे. या उत्सव मूर्तीचे दर्शन भाविकांना नेहमीप्रमाणे घेता येईल. मंदिर प्रशासनाने याबाबत स्वतंत्र रांग व दर्शन व्यवस्था करण्याचे नियोजन केले आहे, ज्यामुळे भाविकांना कोणतीही गैरसोय होणार नाही.</p> <p>पश्चिम <a title="महाराष्ट्र" href="https://ift.tt/xFajyCe" data-type="interlinkingkeywords">महाराष्ट्र</a> देवस्थान समिती व मंदिर प्रशासनाने भाविकांना आवाहन केले आहे की, 11 आणि 12 ऑगस्ट रोजी गाभाऱ्यातील मूळ मूर्तीचे दर्शन बंद राहणार असल्याची नोंद घ्यावी. या दिवसांत मंदिर परिसरात मोठी गर्दी होण्याची शक्यता असल्याने भाविकांनी शिस्त व संयम बाळगावा, तसेच मंदिर प्रशासनाच्या सूचनांचे पालन करावे.</p> <h2>मंदिराचा ऐतिहासिक वारसा</h2> <p>अंबाबाई मंदिर हे <a title="कोल्हापूर" href="https://ift.tt/bstczF4" data-type="interlinkingkeywords">कोल्हापूर</a>चे आध्यात्मिक व सांस्कृतिक वैभव असून, करवीर नगरीचे मुख्य आकर्षण आहे. देवीची मूळ मूर्ती शतकानुशतके भाविकांच्या श्रद्धेचे केंद्रस्थान आहे.&nbsp;मूर्तीच्या संवर्धनासाठी केवळ तज्ञांना प्रवेश दिला जाणार असून, या प्रक्रियेत पारंपरिक पद्धती व आधुनिक तंत्रज्ञानाचा वापर होईल. ही प्रक्रिया पूर्ण झाल्यानंतर मूर्तीवर एक संरक्षक थर तयार होईल, ज्यामुळे तिची दीर्घायुष्य वाढेल आणि भविष्यातील हानी टाळता येईल. यामुळे, अंबाबाई देवीच्या दर्शनासाठी येणाऱ्या भाविकांनी या दोन दिवसांचा विशेष विचार करूनच मंदिर भेटीचे नियोजन करावे, असे मंदिर प्रशासनाकडून सूचित करण्यात आले आहे.</p>

source https://marathi.abplive.com/news/kolhapur/kolhapur-news-ambabai-temples-original-idol-to-remain-closed-for-darshan-for-2-days-1376079